卅一

數字。好可怕。

--“在有生的瞬間能遇到你，竟花光所有運氣”



01）多幾（9）年唔知係唱《男人四十一頭家》定《男人四十打功夫》。
02）升官，發財，取老婆。呢個口號白嗌咗好多年。居然未有一個做到。更弊嘅係任何一個心理同客觀上都未預備好。
03）理財方面要注意。
04）健康更更更要注意。人生仲有好長嘅路。
05）開始講人太多壞話。要提醒自己講人一個壞話，要提醒自己自己九個缺點同對方嘅一個優點；講人地一個優點要提醒自己自己九個優點同對方一個缺點。如果自己九個缺點同優點都舉唔出嚟，好打極有限。
06）要不斷提醒自己自己唔係太叻，唔好假設自己知道人地心唸緊咩，唔好假設自己俾對方知得多。就算對方睇起嚟好白痴，做埋啲你唸唔通嘅嘢。呢啲都只係講明自己太膚淺。尤其年齡越嚟越大，比自己年輕嘅人越嚟越多。唔好假設自己一定俾對方知得多，識得多。分分鐘俾啲人扮嫩食老虎你都唔知。（最盞鬼係咪假設自己係老虎，就算係老虎，人地可能揸萊福槍。）
07）三十而立。家下其實想趴係度養老。
08）嚴以律己，寬以待人。
09）盡人事，聽天命。未盡人事，勿怪天命。
10）天助自助者，改變命運靠自己。做自己的主人，不要讓別人主導。
11）學無止境，咪話三十一，八十一都要保持開放心態。面對環境，學習新事物，對世界保持好奇。
12）真有一日上咗位，唔好得意忘形唔記得自己係邊位。（迷音：你有得上至算啦）
13）有時都會唔爭氣咁唸：“到底仲要挨幾多年啊....？”
14）要感恩下其實上天對自己不薄。唸過要砌一架車，於是大學去讀機械工程，於是真有機會做咗。中學設計幾年嘅班服，始終無當選，終於大學營服成功當選咗。唸過做平面設計，其實唔咩天分，但都有自己印過貼紙，做過Logo。唸過做Patent Agent，雖然無去做，但終於都有同相關人士合作過。唸過產品設計，無去讀，但設計過產品嘅機殼，雖然覺得完全唔合格，唔係自己覺得可以接受嘅嘢。想搞生物科技，都算有搞到。仲有場棟篤笑稿未度好。或者仲有部小說未有恆心去寫。
15）無實際感情經驗。但單戀嘅人一個比一個長。最後一個斷斷續續糾纏人地九年。有後悔嘅事，對唔住嘅人，過意唔去嘅愧疚，失過約，頹廢，無奈，同遺憾。亦作過啲失心瘋嘅事。有時，係度唸，可能已經唔知自己係點看待呢個緣分。
16）會做啲奇怪嘅事，送啲賀年片，送啲禮物。其實係想提醒自己，除了工作之外，自己係一個人類，人類需要多關心別人，需要有啲社交，需要保持對世界嘅好奇。
17）盡量再搵啲興趣去做下啦。唔好咁悶。
18）對照返幾年前嘅自己，有啲嘢未變，有啲心態變了。期望有啲核心嘅價值要保持初心。亦期望自己不斷跟隨環境跟進，調整自己。
19）家姐提醒了自己，似乎年紀越大嘅同時，眼界越嚟越狹窄。以前仲會不斷咁睇新聞，注意下環境，睇世界趨勢。家下只會睇戶口仲剩幾多錢，發老闆牢騷，同拾下條街幹多人亂丟嘅垃圾。
20）盡量抽多啲時間，反省下自己。唸下接落嚟要做麼。畢竟14嘅嘢居然清到差唔多。真嘅係時候Reload下。（朋友，呢個白口號嗌做十年哦）
21）突然間唸唸下，原來02係要加到14入面嘎。
22）其實寫20嘅時候，係想講抽啲時間上嚟寫啲嘢（雖然家下真嘅無人睇了）。但始終最好保持呢個習慣。唔係腦會生鏽嘎！題材唔拘。
23）提醒自己咪太過眼高手低。咪講就天下無敵，做有心無力。咪意見多多，唸辦法就無辦法。
24）有啲開心嘅日子可能過咗。不過請耐心同祈望嘅等待。會做到嘅。
25）一個人時候，就暫時先享受下呢仲無咩牽掛，任逍遙嘅人生啦。
26）跟著去邊度好呢？（呢句都好似重複咗好多年哦！）
27）真係仲有好多地方需要去，好多經驗需要經歷，好多關需要過，好多心魔需要破。
28）好懶啊。。。可唔可以唔使做啊？？？
29）後生仔，咪太心浮氣躁，要平靜落嚟。多聽，多唸人地講嘅嘢。
30）十年人事幾番新。三個十年可能至少有十番新了。有時睇下，雖然自己比較起嚟人緣薄啲，不過真嘅身邊嘅人都變咗幾批。曾經好多似乎好熟悉嘅人，居然連SMS同面子書打個招呼都唔回應了。有時真嘅唔知係咪自己唔知道就得罪咗人。當然亦有自己真嘅對唔住嘅人。
31）點都好。仲喺身邊嘅人，曾經經過嘅人，離去嘅人，我得失嘅人，一啲唔想再見我，一啲我唔想再見嘅人都好。都感激你地出現/曾經出現過。而今日形成呢個卅一點嘅我。