今日返歸時候，
巴士站無端端出現咗個新號碼
--134
（新號碼，喇喇臨寫低佢，聽晚開噶。）
新事物，通常啱啱見到都會驚青，
會唔會載咗我去荷蘭。
於是乎就甘放咗佢走。
司機又無好落力為自己打廣告，
介紹下呢個新屎坑到底去邊嘅。
望下個車站個號碼板，真係多咗新車。
但告示板未有新車各個站位嘅資訊。
新車上了，但各資訊未有良好處理，
民眾未得到最新嘅通知。
======== 吶，事先聲明，我係分隔線嚟 ========
跟住
平時搭開嘅76閂住道前門到站。
單開後門。
擺明唔俾人上車。
因何事幹？
隔開半分鐘到，
車上人幾乎盡空。
司機先至打開前門。
劈頭一句：
“不好意思，你們是去哪裡的？”
“我這輛車現在是去Eunos, 不是去Tanjong Katong了。”
一堆人一臉茫然，
車去路空。
======== 俾地機會我分割線發揮下了--餵 ========
我其實平時有三個選擇：43，76，135
隔開十分鐘左右，又一76蒲頭。
今次又係閂住道前門。
一睇我知梗又係同樣嘅問題。
眼立即矂下後面有無134。
等唔到134，有135，飛都要飛過去。
終於搭上咗車。
======== 好喇，咪嫐我啦，最尾一次分割線咯 ========
呢個故事係話：
1）有效率嘅國度如新，都有改太快未來得及更新嘅資訊。
要保持開放嘅心態，醒目，必要時推翻已認定嘅狀況。
唔係過咗幾十小時仲傻愣愣甘等一趟再唔會載你嘅車。
2）號碼只係一個代號，要認清自己要去嘅方向。
否則真會有一日俾人載咗去荷蘭。
3）巴士公司抽起一個號碼，另一署就會發另一個號碼俾你；
無關緣分，是Demand, Supply 同 Planning嚟嘅。
就好似設計師封咗呢邊呢度門，就要喺第二個方位開扇窗，
否則氣流不通，無得出入，邊個嚟住呢？
4）有買有希望，唔買咪失望。
##23/03/2016 後記
今日終于搭上134，仲發現資訊都有（千祈唔好懷疑新國嘅效率）
而且就係喺尋日號碼板下嘅小告示牌，而非我尋日專登捨近求遠去睇嘅大牌。
5）有時資訊就早眼前，卻因同自己所假設嘅形式有出入而發雞忙，睇唔到。
呢挺嘢連大企業都會出現而導致資訊中斷，所謂非天機不可洩露，而係就算洩露，你都會睇漏。
No comments:
Post a Comment