三十

1. 三十。係三個十年。套柴九問答題，人生有幾個十年。起碼過咗三個。
2. 終於，路邊妹妹仔再講聲：謝謝大叔，唔會覺得唐突。再過6年，做埋佢老竇都得。
3. 2012年，我唸住呢粒地球可以就甘玩完。結果唱完陳奕迅嘅陀飛輪，今年輪到唱李克勤嘅一枝花，十年後可以撿要秋官嘅男人四十，定係林子祥嘅蓋世男兒。
4. 朋友捎來祝賀簡訊，恭賀步入三字頭。三字頭，聽起嚟幾可怕。朋友話，明年到佢嘅話，千祈唔好甘祝賀佢。


5. 我大可以祝佢三十一枝花；幾時要成家？
6. 其實心中有啲害怕，佢又點知，明年嘅時候，我仲可以/仲會祝佢生日快樂？
7. 1986-03-18 到 2016-03-18 總共有10958日，此後每一日可以想像每過一日差唔多係人生中嘅唔到0.0001日。難怪覺得每一日過得越嚟越快，越離越快。
8. 越嚟越少點解，越嚟越多--好出奇吖？
9. 三十其實唔係好恐怖，恐怖嘅係十幾歲唸住好好讀書，將來買車買樓養番狗，娶妻湊仔，落地玻璃辦公室---一件都無。 唔好話Benz跑，連BMX腳車都要度一度銀行戶口。
10. 想當年24，26，隨便十幾分鐘就打嗮。今年唸咗幾日都寫唔到十點。
11. 嚇親人嘅唔寫得，切到政治嘅唔敢寫，各種專業嘅驚寫錯俾人笑當你無到，又驚寫咗post上facebook 無人like兼且無人嬲。提到舊人嘅亦到已經寫到發現自己太羅嗦了。乾脆嘀好。唔係無人頂得順。
12. 有無讀嚟讀去，發現18，19，20，21，22，23，24，25，26，27，28，29，30寫出嚟嘅嘢都差唔多。進入人生三幅被模式。好消息係人生無咩大變，安安穩穩。思想無咩進步。
13. 不斷有人post,27歲前，28歲前，30歲後，40歲後麽叉麼叉。睇下就好。有時度唔到甘遠，有咩想做盡量去做，對得住自己就好。
14. 有個笑話係甘嘅----一人去算命，算命佬話：“你三十歲前會過得好苦。”“甘三十歲後呢？”“你習慣咗。”
15. 幾歲嘅男孩，鍾意同班嘅女孩；十幾歲嘅時候，追隔離班個校花；二十歲鍾意十八歲學妹；三十歲鍾意十八歲學生妹，四十歲....男人三十係個變得專一嘅轉捩點。
16. 家中有老婆者，會將專一由年齡換為對個體嘅專一。請各位太太一萬個放心，手下留情。例外者/非例外者都絕對於本人無關。
17. 年紀越大，似乎唸唔通嘅嘢越大。阿媽話齋。三十歲後人會傾向信仰。難怪嘅。無信仰嘅都無所謂，無法解釋嘅事情，可以歸咎於宇宙法則。
18. Google阿法狗對李世石 4：1, 唔知幾時會有個機器人做老細，做埋我個分，揾埋我個份。定係如果我係人工智能，會清除呢個叫做人類嘅寄生蟲。
19. 尋晚8.30 到9,30， 地球一小時，我熄咗部電腦，手機，燈；想要唸下我個人生，到底對粒波有咩貢獻。結果連人腦都熄埋。
20. 有時會覺得周圍越嚟越靜。
21. 工作，2009年當時其實無太唸過要做咩，只要對社會有貢獻。想過繼續係汽車界，但最終門不通。輾轉變咗個機器佬。期間不斷覺得生產業只係不斷製造消費品，消費品又不斷變成垃圾。但人要食飯，地球會冧，人都仲係要食飯。時不時出嚟哎下我愛地球，開心萬歲，熄燈一小時。隔日繼續消費，做經濟系統中嘅一粒齒輪，螺絲，又或者我可能係滑珠丝杆，馬達定喇。
22. 四年後太悶，丟咗信發顛甘搵新嘅意義。結果各門大關。三間連續應聘嘅都仲係同行。新公司好事多磨。搞咗兩年。慶幸都識得一班有趣嘅同事，有趣嘅高層。又轉到而家，可能終於係一個自己更想要嘅平台喇。
23. 又談工作----發現有規範嘅時候，渴望改變嘅彈性同自由。反而人到咗一個新地方，無規範，無疆界，無解救，想要揾個上帝搭救。更多時候我地望向領導人，希望領導人有遠見，有大局，有細節，有....但無一個人係完人嘅。如果，其實老細有時都唔係好明自己做緊咩，你又唔係好明點去點佢，甚至你懷疑自己其實又錯。甘樣嘅一片大霧。又有咩人係救星呢？
24. 地球一小時，我話熄機。啱啱好就嚟春分，赤道一帶連日酷熱。阿媽問我，熄燈一小時會唔會第二日就冷。我話，當然唔會喇。呢個不過係你錠咗粒核子彈，然後爆咗一大片森林，最後發現仲死剩顆草，於是搵滴水淋下佢啫。
25. 有好多嘢，有時唔知做嚟做咩。但無方法，只好做落去。好比老細唸咗個死梗嘅方案，要你去做，你彈返佢。佢其實聽到你講咩，明白你講咩。但係又唸唔到其它橋，又唔甘願佢嘅智慧結晶就甘Close File死無對證，啱啱就過薪水，就彈咗句：“I Can't Accept No Trying" 。
--老細可能知，可能唔知你之前已經Try Try Try嘎。但唔Try Harder, Who Knows? 可能有奇蹟？
26. 呢個就好比各界話，其實畜牧業應該控制，能大幅減低溫室效應，但似乎都行得好慢。又我鍾意隔離班小學同學起，都我已經永遠鍾意十八歲嘅靚妹，習慣咗呢一世勞勞碌碌，無咩建樹。似乎都好慢。大氣層穿窿，似乎已經變成聽唔到嘅回音。
-- 你唔好永遠當佢係回音吖。前年有個非常冷嘅過期冬天，跟住舊年有個溫暖嘅冬天，接著北極雪融化，今年年頭寒流大侵。李奧納多拿獎嘅時候講咗兩句，全世界好High，但希望聽完Try完Try Harder，Try Even Harder完Try Har-der and Hard-er 完真係有用啦。
27. 聽返嘀舊歌，終於聽明嘅時候，就發現又老咗。
28. 印證咗同一篇都係講嚟講去三副被。無咩重點。
29. 年紀越大，人生座右銘變成--做一日和尚，敲一日鐘；做多日和尚，敲多日鐘。
30. 下一個十年，想點樣睇自己，世界呢？唸爆腦，都係瞓先。