因為不同 所以害怕

5月8日
母親節。

一早醒來，第一則留意到嘅新聞在美國。一位經濟學教授搭機時過分專心，正在寫緊微積分。居然嚇到咗隔離一位女士。女士起初故作鎮定，卻暗中通知空姐，並裝作有病落咗機。落嚟教授被安排會談，才發覺可能自己睇嚟似中東人，又唔知寫緊啲咩，居然被懷疑係恐怖分子。佢只好公開自己身份，國籍同正在演算嘅草稿紙。證實係誤會一場。


呢件事其實唔知係唔係好笑，定好氣，定無奈。

有人問，如果呢位教授唔係歐洲籍，唔知事件會演變成點樣，唔知會唔會被請落機，再轀48小時細心盤問。我之所以有共鳴，在與我同呢位教授一樣，會在機上思考一啲問題。雖然我未試過做“危機分”。舊年一次搭機，我就曾經在機場計算過某設計需要嘅運動角度同平衡。而家發現原來做數學居然係如此怪胎，真捏一把冷汗。

換一個角度，將自己變成女士嚟睇；佢真係好可能因為機警智慧，救咗成架機。邊個話一位計緊微積分，嘅教授唔係恐怖分子呢？會唔會有一日，真係有一位超能人，當場做演算，計劃恐怖襲擊，計算過飛機點自由落體，跌到自己要嘅範圍；大慨幾多炸藥，在飛機上某一個特定位置炸最有效。然後全程嘅演算在一個記事簿中，被人起咗底。

就連911事件後，關卡都曾經話過，要留意帶日曆計劃簿嘅人。一位一本計劃簿，可以做進度表，跟進各事件，大量聯絡，功能諸多。

萬一真有萬一，係咪以後在人群中演算數學嘅人，都好可怕？突然間數學嘅希臘符號，阿拉伯數字堆砌成咗《鋼之煉金術師》中嘅各種咬尾蛇符號，術式；又或者係《哈利波特》嘅咒語，爬走話之類，定係《X-戰警》，Marvel嘅各類超人英雄。數學家們突然間要隱姓埋名，數學係一門禁術，千祈唔好俾人發現你識得三角函數，矩陣，組合...

--以上描述，睇嚟係好可笑嘅。可笑在與，數學呢門嘢歷史已經好悠久，覺得佢可怕，除非你係一直重考考唔過關壓力大到崩潰嘅學生哥。從呢件事嘅結局睇嚟，我就會笑呢位“無知婦孺” 居然累到成班機Delay咗兩個鐘頭。

唔好笑嘅地方，在於點解會如此“小題大做”？因為呢啲年頭後，世界好驚。呢個世界好驚。驚嘅來源，在於一少群人散佈嘅恐怖，恐怖後導致標籤，標籤後導致隔離，隔離產生咗唔了解，唔明白，唔熟悉嘅模糊。

未知，係一種浪漫。唔確定性之中，令人不知所措，充滿遐想。當一種恐怖，變成呢種未知嘅標籤之一，未知變成一種恐怖。我仲未提到如果係熟悉嘅事情，一日突然變成未知，再連上恐懼之後嘅效果，那係一種從秩序墮落成混沌嘅一個升天效果（阿生，你睇Batman太多）。

就好似一覺醒來，居然成間房都係咒文，你好驚。（鬼戲都係咁拍）但定眼一睇，係《金剛經》，你突然安心咗。但最近有殺人魔，殺人前會先抄一屋金剛經，你此時崩潰了。前面係唔熟悉，然後熟悉，最後熟悉但你另外關聯咗另一種恐怖符號。

我話唔好笑，因為呢種情形，不斷咁從唔同嘅角度出現。 一個色情狂借cosplay為由，企圖強姦女孩，結果殺咗對方，突然，所有睇漫畫嘅人，都係怪胎，變態。 一群話自己係真主代言人，亂炸人嘅分子，就變成無法唔對某種輪廓提高警戒。然而，隔離嘅最後，都演變成真正嘅打壓，最後變成一種死循環。小啲嘅事，就變成一種種族特別有生意頭腦，不斷侵蝕它族嘅飯碗，恐懼嘅人，最後變成咗有心人嘅死撐份子。無論自己點俾剝削，都唔發現，剝削自己權利嘅，正係自己支持緊嘅一方。而對立嘅一方，亦不斷守護自己，變成兩道越起越高嘅牆同大砲。最後，無人有辦法拉低牆，亦再無人可以保證，拉下牆後會變成點樣。

“因為不同，所以害怕”， 無記錯，應該係鋼煉中嘅一句對白。